【治玄奇說】失眠
失眠係一個好常見嘅病,尤其是香港人,最近經常都會因為種種原因,令到成晚冇覺好瞓。今日就等大家都可以認識一下失眠呢個問題,希望對大家有多少幫助。
首先,失眠有個定義,符合以下其中一個條件就已經算係失眠。
1. 難以入睡(>30分鐘)
2. 睡眠難以維持,經常睡到一半突然醒來;或者一旦醒來後就難以再入睡。
3. 太早起床,而且難以再次入睡。
而失眠最簡單可以按以下情況分類:
![](https://static.wixstatic.com/media/28eda3_ee1350b66aa643bb99999fc4b6934b32~mv2.png/v1/fill/w_79,h_41,al_c,q_85,usm_0.66_1.00_0.01,blur_2,enc_auto/28eda3_ee1350b66aa643bb99999fc4b6934b32~mv2.png)
如果要知道點先瞓得好,就要知道究竟人瞓覺嘅原理係點。中醫認識事物,就離唔開陰陽。今日就同大家揭開呢個神秘面紗其中一頁。記住呢個口訣:“陽主動,陰主靜”。陰陽交會,陽入陰則寐,陽出陰則寤。平時陽氣主宰我哋嘅活動,當大自然陽氣開始下降(日落,黑夜來臨),陽氣亦都會慢慢潛入陰份,我哋就會開始眼瞓,然後瞓著。而當大自然陽氣開始上升(日出,黎明來到),陽氣亦都開始從陰份走出嚟,我哋就會自然醒。
換言之,只要我哋身體唔可以正常按住以上原理運作,我哋瞓覺就會出問題。最簡單去講個原理,就係陽氣過盛,或者陰氣過虛。前者因為陽氣太想“動”,唔願意藏於陰份。如果太遲先入陰份,就會造成“難以入睡型”失眠;如果陽氣動靜反覆,明明藏咗入陰份,但係又彈出彈入,就會造成“不能持續沉睡型“失眠;而如果太陽都未出嚟,陽氣太早開始”動”,就會變成“早醒型”失眠。
至於陰虛嘅原理,大家都可以思考一下,其實同陽氣太盛差唔多。想知道自己諗得正唔正確,可以留言同醫師討論。
至於點解會失眠呢?主要原因有四:
1. 情緒影響
2. 飲食不節
3. 素體虛弱、久病或者大病後
4. 勞逸失度
情緒方面,最常見都係過份思慮、憤怒。思慮太多,會令脾胃受傷,脾胃功能受到影響,就可以出現進食分量減少,或者食咗落肚都轉化唔到足夠我哋身體需要用到嘅氣血,令到血虛陰虛,養唔到心神,於是出現失眠。太過憤怒,會令肝氣疏發太過,陽氣太盛,同樣引致失眠。醫師建議適當時候,將自己抽離影響自己情緒嘅事情,身體要緊啊。
飲食方面,主要都係會影響到脾胃。例如生冷、肥膩食物,脾胃要用更多陽氣去運化食物,令到脾胃虛弱,氣血生化不利,繼而養唔到心神。又或者成日食辣、食滯等,會令痰熱內蘊,熱鬱喺身體入面,令陽氣偏盛,造成失眠。
如果身體本身偏弱,或者久病大病之後,常見肝腎虛弱,出現一種狀態叫“心腎不交”,令到心陽亢盛。陽氣太盛,自然就會可以出現失眠。老人家大多數屬於呢一種。
(補充小知識:根據衞生署基層醫療統籌處發佈的 《香港長者護理參考概覽 – 長者在基層醫療的預防護理》2017修訂版所載: 「一項本地調查顯示,在本港社區居住的70歲或以上的華人長者,有 38.2%患有失眠 (例如入睡困難、晚間經常醒來或過早睡醒 ) 」)
最後勞逸失度,簡單地可以當係Work Life Imbalance。過勞則耗氣耗血,過逸則脾傷,脾弱氣虛,運化不濟,食咗嘅食物唔能夠化生氣血,以致血虛不能養心,心神不安而失眠。
失眠可以造成以下常見伴隨症狀:
健忘
神不守舍
心慌
胸悶
心神不寧
心悸
長此落去,會令精神狀態長期處於病態情況,所以如果開始發現自己失眠情況多於一周,建議盡早求醫。亦都祝願大家可以盡快有覺好瞓。
![](https://static.wixstatic.com/media/28eda3_4b4df5dc14214fd4976bc885fe240036~mv2.png/v1/fill/w_63,h_58,al_c,q_85,usm_0.66_1.00_0.01,blur_2,enc_auto/28eda3_4b4df5dc14214fd4976bc885fe240036~mv2.png)
轉載圖片:https://www.instagram.com/riepoyonn/