求診中醫必讀說明書

行醫日久，醫師發現好多病人好容易忽略咗睇中醫嘅一啲細節，從而令醫師診症過程增添難度。今日希望同大家分享一下，希望大家下次睇中醫時都注意一下。

首先第一點，就係遲到問題。醫師最怕就係做好預約嘅求診人遲到，因為預約排好晒，如果求診人Ａ遲到，但又唔通知診所，咁就好容易令到後面嘅預約炒晒車。好多時為咗取捨，有醫師可能會為咗對其他準時求診人公平，唯有將求診人Ａ嘅診療時間縮短。所以如果知道自己會因各種原因遲到，建議提前通知診所，等診所姑娘或者醫師可以作出最適合安排。如果唔係，蝕底嘅永遠都係自己。不過其實準時本身就係做人最基本嘅禮儀之一，所以都唔係淨係關求診中醫嘅事，接住落嚟其他幾點先係特別要學嘅。

第二點，就係要避免對脷苔加工。部份求診人因為儀容問題，或者覺得脷苔等於唔衛生，所以刷牙時會刮走脷苔。但其實脷苔對中醫望診佔有一個幾緊要嘅位置，脷苔顏色、分佈、質地等等，都係醫師要考慮嘅，背後反映住身體唔通嘅情況。所以最好睇中醫之前，盡量保留原本嘅脷苔，同時避免進食或者飲用會染色嘅食物或者飲品，例如茶、咖啡等。另外，香口膠都會黐走晒脷苔，所以要留意喇。

第三點，就係要盡量保持脈象貼近病情本身。如果病人係趕時間嚟到診所，又或者啱啱食飽冇耐，甚至乎飲完酒嘅，脈象都會受到影響，從而影響到醫師進行診斷。當然如果係趕到診所，醫師都可以俾病人坐低抖順條氣，等脈象緩和返先應診。但如果係後面兩種情況，就唔係一時三刻可以回復正常。所以如果想醫師診斷準確，呢點都要留意。

第四點，係要相信醫師嘅診斷能力，呢個某程度上係對醫師嘅尊重。有時候，唔知點解有啲求診人會拎住一啲以往喺其他地方食用過嘅中藥處方，要求醫師開同一樣嘅藥物，咁其實如果覺得以往食得舒服，大可以去搵返當初開呢條處方嘅醫師，甚或拎條處方自己去藥房配藥。入得嚟診室搵得個醫師診症，醫師就有責任為病人提供當下最正確嘅診斷。皆因中醫理論入面，病唔係一樣靜態嘅嘢，而係一個動態、不停變化嘅過程。最簡單咁講，如果你一個星期前食呢劑藥覺得有效，你一個星期後再處方同一樣嘅處方，反而有機會已經唔適合，因為病情已經減輕咗，再食同一樣嘅藥落去，效果就會太大，繼而產生其他不適。中醫講嘅係中庸之道，講求陰陽平衡，所以要記住「過猶不及」，凡事太多太少都係唔好嘅。

第五點，就係盡力配合醫師，幫佢完成診斷嘅工作。部份求診人唔知點解會抱住想挑戰個醫師，當醫師進行問診時，病人會拒絕回答，淨係叫醫師摸脈。《黃帝內經．素問．徵四失論》入面就有提到四種醫師常犯嘅過錯，其中一種係：「診病不問其始，憂患飲食之失節，起居之過度，或傷於毒，不先言此，卒持寸口，何病能中，妄言作名，為粗所窮，此治之四失也。」講緊嘅係古時有醫師輕視問診，淨係單靠脈診進行診斷，結果對疾病成個發展過程唔能夠詳細掌握，診斷自然有所偏差。同樣道理，如果醫師為求診人進行望聞問切四診時，求診人應該全力配合，而唔係有所隱瞞，甚至拒絕回答，咁樣只會令醫師診治上增添困難，最終受害的都係求診人自己。

求診時，或者仲有好多細節應該注意，但如果能夠確保做到以上呢幾點，至少能夠為醫師提供更好嘅診斷條件。

圖: 互聯網