【治玄奇說】鼻鼾-納百川

今日於網絡社交平臺,見到有網友因爲自己扯鼻鼾,清晨5點俾枕邊人趕咗落街,都真係幾陰功。相信呢啲CASE絕對唔止一單咁少。的確鼻鼾呢個問題,係好困擾,而同一般疾病其中一個不同之處,就係患者自己本人係無自覺,痛苦嘅往往係身邊嘅人。今日就同大家嘗試拆解鼻鼾呢個問題。


首先從最簡單嘅解剖去理解鼻鼾嘅成因。鼻鼾其實係由於平臥時,因爲舌頭、軟腭(吊鐘)、同埋咽喉部份肌肉鬆弛,令到上呼吸道收窄【參考下圖】。當呼吸時,空氣通過受阻嘅呼吸道時,會令周圍嘅軟組織震動,而呢種震動就係我哋聽到嘅鼻鼾了。如果當呼吸道受阻情況嚴重,就會出現睡眠窒息症。


(網絡圖片)


而常見會出現鼻鼾嘅人有三種。第一種大家普遍都有概念,就係身形肥胖嘅人。因爲肥胖嘅人除咗外在體型,連舌頭、軟腭等軟組織都可以比較肥大,從而更容易阻塞呼吸道。如果想改善嘅話,就可能真係要從減肥呢方面開始著手處理了。


第二種人係習慣用嘴巴呼吸嘅人,因爲當嘴巴打開時,舌頭、軟腭等軟組織會往呼吸道方向移動。所以坊間有產品係俾你瞓覺嘅時候使用,限制嘴巴張開,從而改善鼻鼾嘅問題。


第三種人,其實同脊椎有莫大關係。特別係有駝背,或者有上交叉綜合症【參考下圖】嘅患者。由於頸部深層肌肉比較弱,平臥時唔夠力去固定正確位置,於是會下垂從而阻塞呼吸道。所以應該要糾正長期錯誤姿勢,包括站姿、坐姿、用電話等等,甚至需要按個別情況進行重訓鍛煉,適當强化肌肉,從而改善脊椎形態,先可以改善鼻鼾情況。


總括而言,鼻鼾都唔係無辦法改善嘅問題嚟,但如果身邊人有呢個情況,都可以好言相勸,積極尋求處理方法,唔需要下下都趕人出街咁凄涼嘅。

最新消息
文章分類
最新文章一覽
熱門標籤
尚無標記。