【治玄奇說】推拿同按摩到底有咩分別?-納百川


痛症嘅舒緩方法有好多種,但唔係種種方法都啱病人自己亂試㗎,萬一光顧到無牌嘅按摩店,出事㗎嘛。


久唔久就會有病人問:「醫師,究竟你哋啲推拿同出面啲按摩有咩分別?」其實「按摩」呢兩隻字本身就係中醫正骨八法入面其中兩法。清朝中醫著作《醫宗金鑒》將正骨手法概括為八個手法,分別係:摸、接、端、提、按、摩、推、拿。亦即係話,本身無論按摩定係推拿,其實都係治療方法之一。只係唔知由幾時開始,就將按摩同推拿呢兩個名分開咗,變咗按摩係用作享受,推拿係用作治療。


「推拿」係透過喺患者皮膚、肌肉嘅點、線、面上面施行手法,疏通經絡,滑利關節,調整臟腑,從而治療疾病,當中範疇除咗痛症之外,其實內科病亦都可以透過推拿手法去治療。因為對中醫而言,所有病都離唔開臟腑經絡,所以只要辨證準確,係可以用推拿手法去治療內科病。咁當然,唔同嘅病,有啲用藥去治療會容易啲,有啲用針會容易啲,有啲用正骨手法會容易啲,呢個就交返俾醫師去做決定了。


最尾都係要提提大家,好多按摩師都冇受過正規醫學教育,對中醫經絡學或者西醫解剖學唔熟悉,早幾日先咁啱有位病人因為出去按摩,按到肋骨骨折,成個月都未好返。所以為咗保障自己,都係搵返受過專業教育嘅醫師去接受治療會穩陣好多。

圖: 互聯網

最新消息
文章分類
最新文章一覽
熱門標籤
尚無標記。

​觀塘 I 黃埔 I 土瓜灣 I 大圍雲疊 I 大圍美林 I 將軍澳尚德 I 粉嶺碧湖 I 粉嶺中心 I 粉嶺逸峰

© 2007 by HONG-KAI CHINESE MEDICINE CLINIC LTD.