【治玄奇說】中藥唔係一定要難飲?-納百川

坊間對中藥其中一個最大誤會,就係好多時會覺得中藥一定係苦,一定係難飲嘅,甚至有病人因為怕藥苦所以唔想飲中藥。今日就想同大家解開呢個誤會。


「苦口良藥」呢句說話大家聽得多,甚至連歌仔都有得唱(暴露年齡系列)。傳下傳下,唔知點解大家就會覺得好嘅藥就一定係苦嘅。但其實本身呢句說話原句係出自《史記.留侯世家》入面寫嘅「良藥苦口利於病,忠言逆耳利於行」。原意指好嘅藥縱使係苦嘅,但係對病好嘅;批評意見雖然刺耳,但對於行為舉止係有好處嘅。透過用呢兩個類比,去灌輸一個正確嘅治病、治身、治國嘅概念,就算藥係苦嘅,勸諫係難聽嘅,如果係為咗醫病或者去改善自身,都應該要去食藥,或者接納別人意見。但偏偏就整整吓變到理解為藥就一定係苦嘅,就大錯特錯。


但又會有啲病人會話:「唔係喎醫師,以前飲過啲中藥真係好苦好難飲喎!」問返佢哋嘅情況,好多時都係因為以前飲嘅中藥,都係味數勁多,連塞落藥煲都塞唔落嘅。試想像下,大家平時一定聽過其中一種玩遊戲輸咗嘅懲罰,就係將唔同嘅食物醬汁撈埋一齊,罰輸家要食晒佢。點解呢種會係懲罰?因為通常將呢啲咁濃味嘅嘢溝埋晒之後,通常都極難食。而調返轉,要細心烹調一道料理,其實每一種調味料,食材之間嘅配合,份量都要調整得好準確,出嚟嘅味道先會好味。換言之,藥嘅味數越多,煲完個藥自然個味道係會好複雜,而呢個「複雜」大多數都係難飲嘅。


其實我哋學習中藥嘅時候,最主要係學習藥物嘅四氣五味(簡稱性味),亦即係溫、涼、寒、熱同埋酸、苦、甘、辛、鹹。中藥點藥發揮作用,係離唔開佢嘅性味。例如:酸味主收,苦味主降泄、甘味主緩主補。所以大多數補藥都係偏甘,而清熱藥多數偏苦。而一個中醫師處方藥物時,應該係要以藥物性味去考慮點樣去處理病人成個疾病嘅變化。不過因為種種原因,有部份舊式鋪頭未必係會以呢種角度去考慮點開藥,最終出嚟嘅藥物一大包,數埋數埋一條處方幾十隻藥,先唔理藥效如何,但味道當然同玩大懲罰冇分別啦。


其實好多時,唔少人日常生活都會接觸到中藥材,例如去街食個飯,都有餐廳會提供杞子菊花茶之類嘅飲品,本身都係中藥嚟,所以重點重來都唔係中藥唔好飲,而係藥物相互間點樣去配合。當然,視乎病情需要,有時候處方嘅難免會比較難飲,但最重要係搞返清楚,中藥難飲唔係必然嘅,同精心烹調食物一樣,如果病情許可下,藥物配合得好,甚至乎成條處方可以好好味,病人又飲得開心,同時藥效又好㗎。





最新消息
文章分類
最新文章一覽