【治玄奇說】「啪骨」迷思-納百川


最近幾個月,好幾位網絡藝人因為UP完一啲搵中醫「啪骨」嘅片,令到香港多一班人認識咗「啪骨」呢件事,甚至帶起熱潮,報紙亦有做過相關專題,講到咩人適合做,咩人又唔適合做之類。不過其實判斷適唔適合做某類治療,個責任應該落喺負責做治療嘅醫者身上(包括中醫、脊醫、物理治療、自然療法等等),病人本身係好難認識到自己個病究竟係咩一回事,除非本身有相關知識,否則好多時都只係學到一知半解,甚至乎自己做錯診斷,延誤治療。


今日想嘗試從另一個角度去講一講「啪骨」呢個主題。其實「啪骨」呢樣嘢,首先並唔係中醫專利,古今中外好多地方都會有類似嘅徒手整復手法,透過用雙手去處理肌肉、筋膜、關節(包括脊椎、肢體、頭顱)等等問題。發展至今,淨係整脊相關嘅流派真係數都數唔晒,簡單分都可以分到做美式、澳式、中式、台式、歐式、日式等等,當中又可以細分唔同學派,各個學派嘅理論或者操作手法又會有唔同。其他相關治療方法甚至有整復頭顱骨嘅顱骶骨治療,同埋日本嘅小顏整骨等等。


基於香港喺相關療法上面冇規管限制咩人可以用到,所以坊間最常見就係中醫、跌打、脊醫、物理治療師會用到呢啲整復手法去處理痛症,甚至乎可能會有人出去俾人按摩時,個按摩師有報過興趣班學過相關手法就幫人做。制度上冇規管,大家就要更加識得去保護自己,搵專業人士去施行治療,特別係脊椎整復上面操作如果出錯,嚴重可至癱瘓或死亡;至於各位做治療嘅醫者,除咗學習手法之外,要記得診斷先係第一件要做好嘅事。當年教我嘅骨傷科老師講過,手法做得再好,如果第一步診斷已經錯,醫人只會變咗害人。希望唔會有人中二病發,覺得咁樣啪骨好有型,就忽視診斷,立亂幫人做。

圖:互聯網

最新消息
文章分類
最新文章一覽