【治玄奇說】中醫史上最重要嘅人──張仲景

今日醫師想同大家介紹一位好重要人物，如果歷史上冇咗呢位人物，好有可能中醫會因為療效唔好，晨早已經被歷史淘汰咗好耐，呢位人物就係東漢時期嘅張仲景，被後世稱之為「醫聖」。相比起同時期大家都識得嘅華佗，張仲景其實影響更為深遠，但大家未必知道佢係邊個，所以今日希望多啲人會認識到呢位人物，原來三國時期仲出過一個咁了不起嘅醫家。

張機(公元150-219年)，字仲景，南陽郡涅陽縣人。據傳曾經出任長沙太守，雖然後世對呢點因史書缺乏相關記錄而有所爭議，但係對於張仲景醫聖嘅地位，同佢有冇做過官一啲關係都冇，所以可以SKIP，直接睇睇究竟佢有咩咁犀利。

張仲景對後世最大嘅影響，全因佢寫咗一本中醫師必讀嘅著作──《傷寒雜病論》（又稱《傷寒卒病論》）。喺呢本書入面，佢嘅自序有記低佢嘅一啲生平。張仲景喺當時都算係大戶人家，家族有成二百幾人，但係東漢末年三國時期，漢獻帝建安初年起計，唔夠十年，就有七成人因為「傷寒」而死。當佢屋企有200人，即係死剩60幾人。因為感傷當時家中境況，決定「勤求古訓，博採眾方」，透過翻讀以往嘅醫書，學習醫理，同埋搜集大家嘅用方，學習用藥。終於幾經辛苦，搵出「傷寒病」嘅規律，著成《傷寒雜病論》一書，希望教識其他人去診治「傷寒病」，並對於讀到呢本書嘅人仲留低咗一句極句自信嘅說話，「雖未能盡愈諸病，庶可以見病知源，若能尋余所集，思過半矣」。即係如果能夠跟從佢嘅思考方式，雖然未能夠醫治全部疾病，但係可以解決到過半以上嘅疾病。

雖然根據歷史紀錄，當時《傷寒雜病論》一書未有盛傳，所以張仲景在生之時並未享負盛名，而後世人亦對佢生平了解不及另一位名醫華佗咁多。華佗嘅事跡有喺《三國志》當中個別列傳記載，但反而佢並無留下任何醫學著作俾後世，又或者就算有寫亦已經失傳。雖然大家都會知道佢發明咗叫「五禽戲」嘅體操，但具體點做亦都已經失傳，今時今日大家做緊嘅都唔係真正傳至華佗嘅「五禽戲」。

但係張仲景嘅《傷寒雜病論》可以話係為中醫診治疾病定立咗最重要嘅基礎，當代一位著名醫家──任應秋，將張仲景呢套臨床思維嘅方式總括為「辨證論治」四隻字。部份人或者有聽過，而讀中醫嘅亦都必須聽過，但係真正做得到嘅，就必須要讀透張仲景嘅著作，學習到佢嘅思維方式，先能夠明白。現代中醫教材好容易忽略古代經典著作，只以當代出版教科書作為核心學習或者考核內容，並唔係最好嘅教育中醫方法。

張仲景《傷寒雜病論》嘅地位，喺日本漢醫眼中，甚至高於現存最早嘅中醫理論鵲作《黃帝內經》，因為真正教導臨床如何用藥，如何思考疾病，都可以為係源自《傷寒雜病論》。而張仲景嘅呢一套臨床思維模式，經歷咗近乎2000年嘅時間，去到今時今日科技如此發達，人類生活環境已經大有不同，但依然適用。例如大家都比較常聽過嘅「小柴胡湯」、「葛根湯」，就係出至《傷寒雜病論》。當然，判斷如何用書中各種方藥，就要醫師們辛勤學習，不斷臨床，先能夠真正領悟。一般市民就盡量避免自己喺唔清唔楚嘅情況下胡亂服藥，最怕錯服令病情加重。

總括而言，張仲景能夠喺二千年以前就創造到、記載到一種思維模式，傳授後世所有醫家，令呢個世界多咗一種方法去幫助病人解決痛苦，所以大家一定要好好認識呢號人物。冇佢，相信呢個世界會唔同咗好多。

圖: 互聯網