【治玄奇說】點解個人成日都咁攰?-納百川

香港人呢兩年經歷嘅變化多不勝數,生活上面面臨住一次又一次嘅挑戰,好多人都覺得身心俱疲。咁當然,早喺N年前,子華神已經用一句說話概括咗普遍香港人身體嘅狀態。


(網絡圖片)

點解會咁呢?簡單啲講,就係因為勞逸失度。《黃帝內經.素問》第一篇《上古天真論》已經強調:「上古之人,其知道者,法於陰陽,和於術數,食飲有節,起居有常,不妄作勞,故能形與神俱,而盡終其天年,度百歲乃去。」講嘅正正就係養生嘅要旨。要做到形與神俱,先可以健健康康,長命百歲。


(網絡圖片)

咁究竟咩係形同神呢?形,即係形體,即係身體,手手腳腳,全部包晒;咁知唔知咩~係神呀?我哋呢度探討嘅,係相對「形」而講嘅「神」,所以唔係宗教層面上,或者頭D入面阿木講嘅嗰種神。神,簡單啲理解,就係神志、精神活動。形係神嘅載體,神係令形可以活動嘅重心。所以形神合一,我哋先可以係一個有生命嘅個體。


而要再繼續講落去之前,要帶多個概念俾大家,就係「氣」同「血」。當然,呢兩個概念要徹底理解,要花好多嘅功夫。讀者只需要知道,喺中醫嘅理論入面,我哋會將唔同嘅生理機能歸類,分別由我哋身題入面嘅「氣」同「血」去運作。萬一外在有啲不適嘅表現,我哋就會用方法去審視病人身體入面氣血嘅情況,搵出解決方法。


而最簡單咁講,如果將我哋工作性質分類做花費體力(形勞)較多嘅係,就會損耗身體嘅氣較多;而費神較多嘅工作,就會係損耗身體嘅血較多。而如果身體本身氣血充足,健健康康嘅,經過適量消耗之後,理應係透過飲食補充同瞓覺休息之後,可以叉滿電繼續應付自己嘅工作。但普遍香港人嘅情況,一係就透支氣血太多,一係就因為作息唔好,飲食上唔注意,所以經常都係形神俱疲嘅狀態。


至於點先可以避免呢種情況?好問題,香港人好多都真係要硬食,工時過長,壓力又大。唯有睇下有冇得透過醫師處方藥物,嘗試養返好個身體,同時等醫師幫病人搵返啲要改善嘅壞習慣出嚟。希望咁樣有機會改善到呢種情況啦。

最新消息
文章分類
最新文章一覽