【治玄奇說】食咩先有益? 咩叫虛不受補?-納百川

每個醫師總會俾病人或者親戚朋友問過:「廣告介紹xxx產品好有益、yyy產品可以有病醫病,冇病強身,我食唔食得?」又或者大家間唔時都會聽到「食多啲生果有益呀」、「一日要飲八杯水」之類。以上種種,其實全部都係建基於「想身體更加健康」呢個出發點,但其實咩先叫有益呢?呢個就要講返唔同醫療系統認識人體有唔同角度去講返先喇。


好多時大家都有種概念混淆,往往將西方營養學同中醫學混為一談。營養學入面,會將食物成份分析,再將佢發揮於人體入面嘅原理去做為理論,從而歸納出咩食物有益。中醫學雖然都會有四氣五味等方法去認識食物,但講到尾某種食物對某個人有冇益,係以「人」作位主角,食物係要配合返個「人」先可以起到適當作用。


舉個簡單例子,如果有Sales同你講:「羽絨可以保暖,係好嘢嚟呀!」你會唔會第一件事就買?首先我哋要諗:羽絨係咩情況之下係好嘢?係天氣凍。如果三十幾度,同你講羽絨係好嘢,你都會覺得唔適合吧。道理其實一樣,對中醫學而言,冇嘢係絕對有益嘅。所以人參係咪好嘢?對氣虛嘅人嚟講,可能係(都係要視乎返病人嘅情況),但如果本身已經係氣血壅塞不通,再食大補元氣嘅人參落去,氣血會更加阻塞,加重身體本身不適證候。


好多人覺得有益就等於補,所以食補品就有益,但係轉個頭去見中醫診所求診,又會同醫師講:「醫師我唔補得嘅,一補就會上火,我虛不受補嘅。」其實呢句說話背後原理唔係咁簡單。補氣又係補,補血又係補,補陽又氣補,補陰又係補,甚至乎可以再拆細,補肺氣,補心血,諸如此類。究竟話自己唔補得嘅,又知唔知自己點解唔補得?再者,幾年前食補品會上火,係咪代表今日又唔得呢?


講到尾,病人入得診所求診,醫師就係要憑診斷能力,理清病人成個疾病係點樣發展,背後成個機理係點,從而決定用咩方法去為病人醫病,亦即係「辨證論治」成個過程。如果覺得病人係需要清心熱嘅,咁就算苦如黃連,都可能會係「有益」,但如果病人本身係極度虛寒,同樣用黃連,就會變成「有害」。


咁再講講何謂虛不受補,同埋係咪真係咁多人真係虛不受補呢?真正嘅虛不受補,往往係由於身體極其虛弱,就算再用方向正確嘅補藥,但病人身體已經完全冇辦法再因應藥物去補充到需要嘅氣血。而好多時大家覺得自己嘅虛不受補,往往係因為方向錯誤,例如陰虛病人,本應服用滋陰生津嘅藥物,但誤服溫補陽氣嘅藥物,令自己陰氣更傷,就好似本身身體已經唔夠水,你再加大把火,咁自然就會出現更多唔舒服嘅表現了。


所以我成日強調,要用藥,第一,先要了解自己身體情況係點,第二,對藥物有充份認識,二者缺一不可。唔識嘅情況下,食完舒服咗係好彩,食完唔舒服係合理。

圖: 互聯網


最新消息
文章分類
最新文章一覽