【治玄奇說】瞓覺姿勢指南?-納百川

痛症係好多香港人會搵中醫求診嘅主要疾病之一,特別係頸背腰痛。而呢類痛症常見病因包括:

1. 急性外傷(扭傷、拉傷、挫傷等);

2. 以往外傷冇處理好嘅舊患一到返風落雨就痛出嚟;

3. 長期姿勢唔正確;

4. 進食會誘發痛症嘅食物。


之前於《WFH嘅注意事項》一文中,已經同大家介紹過坐姿應該要注意啲咩,今次就講講瞓覺時姿勢同枕頭床褥要點配合,如果唔係到發現姿勢唔好而出現問題時就後悔莫及了。


(截圖自: 機動戰士高達 鐵血的孤兒)

首先最常見嘅睡姿係平瞓同打側瞓。如果閣下係用呢兩種睡姿以外嘅瞓覺姿勢(例如打坐姿勢、扮蝙蝠倒吊、扮小龍女瞓繩),呢篇文就未必幫到你。


平臥時,由於正常脊椎嘅生理弧度,頸椎同腰椎會係懸空嘅,所以就要有枕頭同床褥去承托住呢兩個懸空嘅部位,令肌肉得到充分休息。如果床褥太硬,腰椎懸空部位就冇辦法休息,太軟,亦都冇足夠承托力去支撐整個脊椎,甚至令選擇枕頭難度增加。


而平臥時,枕頭建議不宜過高,最理常就係能夠承托住懸空嘅頸椎同上背部(特別係駝背嘅人更加要留意上背部嘅空位,可以適當加毛巾墊住)。一般而言,平臥時枕頭高度約等同自己拳頭大小。不過如果頸椎生理弧度已經出現變化,就要另外度身訂造了。


側臥時,大原則係要保持對稱,避免脊椎出現側彎嘅情況,所以床褥要搵到軟硬度適中嘅。太硬,腰椎位置都係無辦法承托得住,從而出現側彎;太軟,就反而成條脊椎都冇承托得到,地心吸力會令脊椎向下牽引從而出現側彎。


(網上圖片)

側臥時,枕頭高度首先要搵個同自己肩寬1:1嘅。太高或者太矮,都會令頭部偏歪,從而導致頸椎側彎。第二點,就係要確保頸椎懸空位置有承托,所以枕頭尾部上翹至適合自己體格,或者自行以毛巾加墊都可以。第三點就係建議大腿間夾上高度合適Cusion或者抱枕之類,確保側臥時於上方嘅腳唔會跨往另一邊,從而扭轉盤骨及脊椎。



總體而言,正確嘅睡姿要兼顧好多細節,但亦都係遠離慢性頸背腰同好重要嘅一環。今日盡量深入淺出講解一下,希望大家都可以學識選擇適合自己嘅枕具,或者學到正確睡姿,減少出現痛症。


(網上圖片)

最新消息
文章分類
最新文章一覽