• 納百川

【治玄奇說】中醫針灸原理


針灸作為中醫其中一種常用療法,背後究竟係咩原理?點解搵枝針就咁拮幾下就可以起到治療作用?相信好多讀者如果對中醫有興趣,都一定會思考過呢條問題。今日就同大家嘗試探討呢個話題。

首先要知道,「針灸」其實本身係指緊兩樣嘢,「針刺」同埋「艾灸」。會將呢兩樣嘢Group埋一齊嚟講,係因為大家都建基於同一個系統之上去操作,呢個系統稱之為「經絡」。中醫理論中,經絡係好重要嘅角色,連繫五臟六腑,係全身氣血運行嘅通道。要身體健康,單純從經絡去睇的話,就係要經絡中嘅氣血充盈,以及流動暢通。相反,當氣血不足,或者出現氣血運行不暢,造成氣滯血瘀,就會引致臟腑失衡,繼而出現各種不適。

醫師成日用鐵路去幫助病人理解「穴位」同埋「經絡」嘅關係。經絡就好似鐵路某一條路線咁,將唔同個車站連埋一齊,而穴位就好似鐵路嘅車站咁,往往係人流相對集中嘅地方。所以我哋進行針灸時,就會於穴位上進行治療,因為氣血匯聚嘅地方,療效相對顯著。

(圖片轉載: http://www.47rail.jp/index.html)

(圖片轉載: https://en.wikipedia.org/wiki/Meridian_(Chinese_medicine)

因為經絡係連結住五臟六腑,所以我哋可以透過刺激經絡上嘅穴位,從而調整臟腑。例如因心火熾熱引致失眠,就可以選用心經上穴位去進行針刺,將心經上嘅熱瀉走,從而令病人可以瞓返個靚覺。又或者病人外感風寒,寒邪侵犯病人肺以及膀胱經絡,令病人出現發冷、咳嗽、頸部肌肉緊張的情況,就可以在肺經及膀胱經進行艾灸,溫通經絡。

針灸嘅理論早在《黃帝內經》已經有好詳盡嘅描述,每條經絡嘅行走路徑,同邊類型嘅疾病有咩關連,一一在幾千年前已經清楚表明,一直沿用至今去治療疾病,屢見奇效。如果下次有任何不適,不妨考慮一試呢種療法,親身體驗透過針灸去處理疾病嘅感覺。


39 次瀏覽

​觀塘 I 黃埔 I 土瓜灣 I 沙田 I 大圍 I 粉嶺碧湖 I 粉嶺中心 I 粉嶺逸峰

© 2017 by HONG-KAI PHARMACEUTICALS HOLDINGS CO LTD.