• 納百川

【治玄奇說】WFH嘅注意事項


鑒於新型冠狀病毒(又稱武漢肺炎、COVID-19)於全球蔓延,香港作位重災區之一,好多office工作都轉為WFH(Work From Home)嘅模式,俾員工留於家中工作,減少外出,從而減少致病機會。但係其實WFH有可能有啲容易疏忽嘅潛在危險(約齊人行山打卡不包括在內),導致身體健康出現問題,今日就等醫師提提大家。

WFH,主要潛在危機有二,一個就係之前青衣搞到要全棟大廈同屬07單位居民漏夜撤離嘅U型管。今次疫症病毒嘅傳播途徑仲未可以完全確認,現時一般認為飛沫傳播、接觸感染傳播為主要傳播方式,亦傳言話可經霧化/空氣傳播,嚇到香港人連最鍾意嘅邊爐都唔敢打。而U型管正正係SARS時期淘大花園中經由空氣傳播病毒嘅元兇,所以今次當醫管局發現青衣兩宗個案係住樓上樓下,加上屋苑係有U型管設計,就立即撤離及隔離該棟大廈同一單位所有居民,以減低疫症繼續傳染嘅機會。

而面對U型管呢個問題,香港大學感染及傳染病中心總監何栢良日前建議市民每日倒清水入U形聚水器,保持U形聚水器長期儲水,預防病毒迅速從大廈污水渠擴散。雖然坊間有唔少人會建議用漂白水消毒更好,但何栢良就話如果太多市民每日都喺渠口倒漂白水,會嚴重污染環境,其實只須倒入清水,令U形聚水器長期儲水,已經可以預防病毒散播。

另一個潛在危機,其實同武漢肺炎冇乜直接關係。主要係講緊工作環境轉變,而大多數WFH嘅都係處理文書工作嘅電腦用家。呢個時候最容易出現嘅就係出現頸、腰、背部嘅痛症,原因係屋企嘅辦公Setting未必可以符合到人體工學。香港嘅樓有幾貴大家都知,未必個個人都可以有一間獨立書房,甚至乎一張好嘅電腦檯同埋凳。所以,好多人變相會喺餐檯用手提電腦工作,或者甚至乎喺床度用電腦,令到坐姿出現問題(圖一),累積一兩日,已經可以令到背部肌肉勞酸,嚴重者可以引起脊椎錯位,出現各式各樣問題,例如偏頭痛、作嘔、鼻敏感、失眠等等你諗都諗唔到其實係沿於脊椎嘅問題。

要解決呢個情況,就要避免上圖各種奇葩姿勢。再嚟就係要保持良好姿勢,

適時走動,做返啲頸腰部拉筋。唔好以為坐喺度唔郁就係最舒服,其實長時間維持同一姿勢,會令肌肉疲勞,所以建議至少45分鐘可以俾頸背部肌肉稍作休息。

其他要注意都係例牌嗰啲老生常談,注意個人衛生(包括外出佩戴口罩、勤洗手),因應氣溫選擇合適衣物以防過熱或過冷而感冒,注意休息,適量運動,保持情緒舒暢等等,所謂養生,從來都係由呢啲小事做起。唔好再問有咩湯水啱自己喇~搞掂呢啲細節先啦。

圖:互聯網


49 次瀏覽

​觀塘 I 黃埔 I 土瓜灣 I 大圍雲疊 I 大圍美林 I 將軍澳尚德 I 粉嶺碧湖 I 粉嶺中心 I 粉嶺逸峰

© 2007 by HONG-KAI CHINESE MEDICINE CLINIC LTD.