• 納百川

【治玄奇說】新春最易食到出事


農曆新年係其中一個體現到華夏文化嘅節日,期間有多種節慶活動,例如舞獅、接財神等等增加節日氣氛,期間大家都會四出拜年。呢個時候就要特別留意部分賀年食物,如果唔係食到周身病痛就得不償失,逗完利是都要用哂嚟睇醫生喇。

賀年食品入面,我認為萬惡之首係糯米。但凡身有長期痛症,肌肉經常反覆扯住痛,或者周身酸痛,都應該要避免食用糯米製成嘅食品,包括年糕、湯圓、糯米飯、糯米酒(黃酒、花雕、紹興酒、女兒紅)等等,根據非正式統計,一食完糯米的話,十個有八個都會即刻痛到想往生。另外糯米本身係可以用作溫補脾胃,本來如果針對脾胃虛弱人士,食少少會有唔錯效果,但食得多的話,如果本身胃氣偏弱,脾胃反而運化唔到,胃脹胃痛等等不適表現都容易出現。記得:少食多滋味,食多好滋膩。

除此之外,芋頭製食品亦都係需要留意。雖然芋頭相對糯米容易係消化,但係如果長期痛症患者食完之後,都可以體會到肌肉關節更加腫脹酸痛嘅感受。

當然,講到食,最重要都係要提醒長期胃病病人,如果經常出現胃脹、胃痛、胃酸倒流等嘅人士,最好都係少食多餐,少食濃味食物,同埋生冷食物,盡量減輕胃部負擔,避免禍從口入,自然可以身體健康。

最後都要提多次大家,武漢肺炎真係好可怕,記得記得記得要戴口罩!

圖: 互聯網


9 次瀏覽

​觀塘 I 黃埔 I 土瓜灣 I 大圍雲疊 I 大圍美林 I 將軍澳尚德 I 粉嶺碧湖 I 粉嶺中心 I 粉嶺逸峰

© 2007 by HONG-KAI CHINESE MEDICINE CLINIC LTD.