【治玄奇說】從「濕」去認識中醫理論

作為一個香港人，你聽過有關中醫最多嘅字係咩字呢？我估其中一個一定係「濕」。每逢翻風落雨，老人家會話自己風濕發作，關節疼痛；每逢夏天，屋企人就煲一煲「冬瓜薏米湯」，話可以袪濕。咁，到底咩係濕呢？

濕是怎麼一回事？

要知道咩係濕，首先要對「六氣」有所認識。六氣，係指自然界中六種正常嘅氣候，當中包括風、寒、暑、濕、燥、火，而濕正係其中一氣。「六氣」係屬於自然、正常嘅氣候，但一但出現太過或者不足嘅情況，自宋．陳無擇起，稱之為「六淫」，亦即邪氣，而呢啲邪氣如果作用於人體，則為風邪、寒邪、暑邪、濕邪、燥邪和火邪。

古人根據自然氣候，以及人體反應之間嘅關係，分別將一啲表現歸為六淫。濕邪，在邪氣中屬陰邪，其特性如下：

一、濕為陰邪，易阻氣機，損傷陽氣：

以中醫學角度而言，氣存於萬物之中，不斷運行。而氣喺人體中嘅運動，則稱為氣機。古人透過觀察，認為濕邪於人體中，係會影響氣嘅正常運動。而氣亦係因有陽鼓動才能動，故若陰邪盛，傷陽氣，則氣不能正常運作。

二、濕性重濁：

濕嘅特性之一，就係濕性重濁。「重」大家可以想像成一條毛巾，整濕咗之後，自然會變得更重，有一種沉重下墜嘅感覺。當呢種邪氣表現於人體，就會令人有頭重，關節沉重疼痛等等「重」嘅感覺；至於「濁」，我們可以見到一些表現例如小便渾濁，濕疹流黃水等等穢濁嘅表現。

三、濕性黏滯：

濕另一種特性，就係有一種黏滯嘅感覺。但凡病有黏膩嘅感覺，例如大便不爽、小便不暢、舌苔黏膩，大多屬濕；而「滯」，即有停滯、纏綿嘅意思，一啲病如濕疹、濕溫等有著變化緩慢、反覆發作、纏綿難愈嘅特性，都可與濕有關。

四、濕性趨下，易襲陰位：

根據《黃帝內經．素問．太陰陽明論》：「……傷於濕者，下先受之。」常見一啲下肢水腫、泄瀉等等，多數都同濕邪有關。

濕應該怎麼治療？

當屋企人煲完「冬瓜薏米湯」後，你曾否質疑過其功效？又有否懷疑過老人家風濕發作時，擦跌打酒真能有效？當中嘅機理何在？

其實單論針對濕而言，根據中藥學嘅教科書，就有63種中藥係用嚟治濕嘅。而除咗教科書所囊括嘅，仲有好多其他中藥都可以對濕進行治療。當然，中醫喺用湯劑治療病人時，好少會以單味藥為方，一般會是複方，即多味藥為一方。而就方劑而論，喺方劑學教材中，袪濕劑就有35條方。喺如此眾多嘅數目中，是否每一味藥、每一條方都適合任何一個人呢？

答案明顯係否定的。中醫與西醫最大嘅不同之處之一，就係喺中醫嘅理論中，每個人都係唔一樣嘅，所以冇一條方係所有人都適用，也因此先會愆生出多種方劑去針對唔同嘅病人、不同嘅狀態。也因此，冬瓜薏米湯並不一定能有效治療濕病。

中醫學有一特色，叫作「三因制宜」，即因人制宜、因地制宜、因時制宜。根據人、地、時嘅不同，人嘅身體會有不同嘅變化，故要以不同嘅對策用藥。香港位於廣東沿岸，每逢夏天中期及後期，即轉吹東南風，加上天氣炎熱，故常見暑濕氣候。

先睇一下冬瓜嘅藥效。冬瓜睇落好似只係一味藥材，實質可分為三部份：冬瓜皮、冬瓜肉以及冬瓜仁，三部份皆有不同功效。冬瓜皮味甘，性微寒，可利水消腫、清熱止咳、利濕排膿；冬瓜肉味甘淡，性微寒，可清熱解毒、利水消痰、除煩止渴、袪濕解暑；冬瓜仁味甘，性微寒，可清肺化痰，消癰排膿。簡單地總括，能夠治療暑濕。

再看一下薏米，一般而言，在冬瓜薏米湯中，用的都是生薏米(又稱生苡仁、生苡米)。生苡仁味甘淡，性微溫，可健脾滲濕，除痺止瀉，清熱排膿。與熟苡仁最大的分別，可說是滲濕力較強，健脾力較弱。故生苡仁可說是主要用於治濕。

當兩者用在一起，的確能有袪除暑濕之效，在香港於夏天喝，對一般人來說頗為適合。不過要注意嘅係，若身體有明顯嘅濕病，如水腫、泄瀉、頭重等等，則應尋求專業意見，搵註冊中醫睇病，不應單以呢啲保健湯水去做治療，否則不能有效針對疾病之餘，分分鐘可以令疾病變得更為複雜，延誤治療嘅時機。

至於針對老人家嘅風濕病，跌打酒嘅作用又是甚麼呢？宜家先略略睇吓風濕病嘅主要原因，對原因有初步認識，再睇吓治療方法。

老人與年輕人在體質上其中一個最大的分別，就係老人嘅陽氣較弱，而年輕人則陽氣相對旺盛。於本文中曾提及過，氣血皆需要陽氣推動才能夠正常於經脈中流注，一但陽氣不足，則可常見氣血滯於經脈中。對中醫嚟講，「痛證」嘅原因一般係兩種，不外乎「不通則痛」同「不榮則痛」。前者係指經脈不通，後者係指氣血不足，不能營養經脈。因此可以話，風濕病嘅疼痛原因，可與兩種原因同時有關，但側重點亦是不通則痛。

至於風濕病嘅發作，除了陽氣虧虛嘅內因之外，也要有風寒濕邪嘅外因配合才會發病。在濕邪方面，可參考本文前半，因濕能損傷陽氣，使經脈更不暢順；而寒亦屬陰邪，可使經脈凝滯，損傷陽氣，使本已不足嘅陽氣更為虛弱。故在治療上，可以內外兼施，既要袪除外邪，亦要溫補內在陽氣，才能有效治療。

當初步了解風濕後，再睇吓跌打酒嘅功效。跌打酒喺市面上有好多種，配方都各自不同，但主要嘅共同功效都係活血通絡。以此觀之，可以話係能夠令人體嘅經絡通暢，能使「不通則痛」造成嘅疼痛得到緩解，但若要確切改善或徹底根治風濕病，都係應該求診中醫，跌打酒只能治標，不能治本。

總括而言，因為香港氣候關係，大家成日都凝住自己會好濕，而令濕呢個字變咗病人求診時十個最常問醫師嘅問題之一。今日同大家拆解完濕嘅特性，希望大家能夠理解到究竟濕係咩一回事，繼而懂得在適當時間尋醫，方為良策。